Urtarrilaren 31n, ostiralean, XVI. Jokin Zaitegi sariketako epaimahaia bildu zen, Imre Kertész Literaturako azken Nobel saridunaren "Sorstalanság" eleberria euskaratzeko lehiaketa erabakitzeko.

  Aurkeztutako hamabost proiektuen batez besteko kalitate maila ona azpimarratu ondoren, Ibon Uribarri, Joxe Azurmendi eta Xabier Mendiguren Bereziartuk osatutako epaimahaiak Urtzi Urrutikoetxearen lana hautatu zuen.

  Urrutikoetxeak 3.500 euroko saria jasoko du itzulpena egiteko, eta lan amaitua irailaren 1erako entregatu beharko du, Elkar argitaletxeak aurtengo Durangoko Azokan argitaratu ahal izateko.

  2003ko Literaturako Nobel Sariduna jakin bezain laster, haren obra bat hautatuko da euskaratzeko, eta deialdi berria egingo, Arrasateko AED elkarteak eta Elkar argitaletxeak aurten hasi dugun sari-modu hau urteroko ohitura bihurtzeko.

  Urtzi Urrutikoetxea (Bilbo, 1977) idazle, kazetari eta gidoigilea da, Ikus-entzunezkoetan lizentziatua, prentsa idatzian eta telebistan aritua, eta hiru poema-libururen egilea: "Borroka galduetatik gatoz" (Susa, 1997), "Gaur ere ez du atertuko" (Ernestina de Champourcin saria, Arabako Foru Aldundia 1998) eta "Utzidazu karmina kentzen" (Irun Hiria Saria, Kutxa 2000)