1)AURKEZPENA

Txantxiku-Txoko elkartean zegoen txirrindularitza taldea, eta 1967an egoitza egin zenean, Aloña Mendiko Sail bihurtu zen. Urte batzuk ahul samarrak izan bazituen ere, txirrindularitza sailak egoera ona bizi du azken urteotan, zuzendaritza sendoa eta behar adina kirolariekin. Ekonomia alorrean babesleak baditu, eta pozik esan daiteke urte osoan egiten den lan isilak bere fruituak ematen dituela.

Profesionaletan ez ezik, beste kategoria guztietan antolatzen dira lasterketak: afizionatuak San Migeletan, jubenilak irailean eta udaberrian, bizpahiru gaztetxoentzat urtean zehar, Arantzazuko igoera, eskolarteko zirkuituak, etab. Berrogeita hamargarren urteurreneko ospakizunen barnean Euskadiko itzuliko lehen etapa Oñatin antolatuko da. Mutikotan kirolari ugari sartu arren, zenbat eta gorago orduan eta zailago izaten dute jarraitzea, ikasketak direla medio edo entrenamenduak gogortuz doazelako. Jubeniletan lagatzen dute gehienek, bakanen batek afizionatuetara igotzea lortzen du, eta aspaldiko partez, tropel profesionalean txantxikuar bikaina dabil, Jon Odriozola ospetsua.

Neskek zein mutilek parte hartzen dute 300 bazkide lortu dituen sail honetan.

ZUZENDARITZA TALDEA: Benjamin Mugarza, Rafael Erostegi, Pedro Irurzun (Lehendakaria), Fernando Etxeberria, Karlos Lizarralde, Jose Maria Odriozola.

2)NABARMENDU DIRENAK

PEDRO IRURZUN, 1950. BETI ULMA CONSTRUCCIÓN-EN ARITU DA LANEAN, EROSKETA DEPARTAMENDUAN. MUTIKOTAN APUR BAT DENETIK EGINDAKOA, OÑATIKO ZIKLOTURISTA TALDEKO SORTZAILEETAKOA, ORAINDIK ERE GUSTATZEN ZAIO DOMEKETAN GOIZENA GOIZ IRTETEA. TOURMALETERA SEI ALDIZ IGOTAKOA DA, ETA LUCHON-BAIONA BIZPAHIRU ALDIZ EGIN DU ZIKLOTURISTA LEZ.

JON ODRIOZOLA, 1970. LANBIDE HEZIKETAK IKASIA, 1995EAN SARTU ZEN BURU-BELARRI TXIRRINDULARITZAN. KIROLZALE SUTSUA, MUTIKOTAN IGERIAN ETA ATLETISMOAN IBILITAKOA. OÑATIKO HISTORIAKO KIROLARIRIK ONENA DELA ESATERA IRITSI DIRA: 1998 ETA 1999AN MUNDUKO TXAPELKETAN ESTATUKO SELEKZIOAREKIN, 1998 ETA 1999AN TOURREKO PODIUMEAN TALDEKA ETA BAITA ESTATUKO VUELTAN (1999AN) ERE, MARCA-K TALDEKO TXIRRINDULARI BIKAINENAREN SARIA, ETAB. LUZE BAT.

MARKEL IRIZAR, 1980. MANTENKETAKO LANBIDE HEZIKETA IKASTEN DIHARDU. GAZTETAN ATLETISMOAN DISTANTZIA ERTAINETAKO ANTXINTXIKA LASTERKETETAN ARITUA, KROSEAN ETA PISTAN. GIPUZKOA, EUSKADI ETA ESTATUKO SELEKZIOETARA JOANA, BEHIN BAINO SARRIAGOTAN GAINERA.