Urtero bezala, Zumarte Musika Eskolan, kontzertu pedagogikoak antolatu ditugu.

20 urte hauetan, hainbat musika eskolarekin elkartrukaketak egin eta gero (Andoain, Lasarte, Elgoibar, Elizondo…), aurten Mutrikuko Udal Musika Eskolarekin egingo ditugu.  

Lehenengo, Maiatzak 10an, Mutrikura joango gara. Bertan Usurbilgo Trikitilariak, Talde Instrumental txikia, Zumarte Txiki-Orereta Txiki eta Zumarte-Orereta abesbatzak parte hartuko dugu.

Hurrengo kontzertua, eta I. "Soinurbil" Aste Musikalaren barruan, Mutrikuarrak izango ditugu gure artean. Kontzertua, Maiatzak 24an arratsaldeko 19:00tan izango da, Usurbilgo Udarregi Ikastolan. Bertan, Mutrikuko Banda txikia, Madalen Txiki abesbatza, Folk taldea eta Dixie taldea parte hartuko dute.

MUTRIKUKO  UDAL  MUSIKA  ESKOLA 

Mutrikuko Udal Musika Eskola 1984 urtean sortu zen. Musika  desagertzen ari zela ikusita, batez ere Banda, bultzatzea erabaki zen. Garai hartan hiru irakasle hasi ziren lan egiten Musika Eskolan, gaur egun berriz, zazpi irakasle gaude lan horretan.

       Musika Eskola ditugun taldeak hauek dira: Banda Txiki; Madalen abesbatza; Madalen txiki abesbatza; Korala; Akordeoi orkestra; Trikitixa taldea; Ganbara taldeak; Teklatu orkestra; Dixie taldea; Folk taldea eta Talde instrumentalak.

       Gure Musika Eskolatik pasatzen dira 212 ikasle astean zehar, eta herriko Bandan 90 lagun elkartzen dira musika egiteko.